ആത്മായനങ്ങളിലെ സഹനവും സമരവും...

ആത്മായനങ്ങളിലെ സഹനവും സമരവും...

GCWവൈജ്ഞാനികമലയാളം ഓൺലൈൻ മാസികയുടെ പുതിയ ലക്കം ആത്മകഥാപഠനങ്ങൾക്ക് പ്രധാന്യം കൊടുത്തു കൊണ്ടുള്ളതാണ്. ആത്മകഥകൾ ഒരേ സമയം ഒരു കാലഘട്ടത്തിൻറെ ചരിത്രവും വ്യക്തിയുടെ ജീവിതവുമാണ്. പലപ്പോഴും ജീവിതത്തിൻറെ കാഠിന്യങ്ങൾ തിരിച്ചറിയാനും പ്രതിബന്ധങ്ങളെ മറികടക്കാനും സഹായിക്കുന്നവയാണ് ആത്മകഥകൾ. സമൂഹത്തിന് അതൊരു സന്ദേശമാണ് നൽകുന്നത്. ഓരോ ആത്മകഥകളിലും ഓരോ കാലഘട്ടം തുടിക്കുന്നുണ്ട് .അവ പഠിക്കേണ്ടതും വിശകലനം ചെയ്യേണ്ടതും പുതിയ കാലത്തിൻറെ ആവശ്യമാണ്. ഈ ലക്കം ആത്മകഥകളെ പറ്റിയുള്ള കുറച്ച് ലേഖനങ്ങൾ ഉൾപ്പെടുത്തിയിട്ടുണ്ട്. കൂടാതെ സ്ഥിരം പങ്തികളും ഉണ്ട്. പരിസ്ഥിതി സംരക്ഷകനും കർഷകനും നെൽവിത്ത് സംരക്ഷകനുമായ ശ്രീ ചെറുവയൽ രാമനുമായിട്ടുള്ള അഭിമുഖമാണ് ഇപ്രാവശ്യം തയ്യാറാക്കിയിട്ടുള്ളത് .പരിസ്ഥിതിയും കൃഷിയും ചേർത്തുപിടിച്ചു കൊണ്ടുള്ള പുതിയൊരു ഇക്കോ സംസ്കാരമാണ് ചെറുവയൽ രാമൻ മുന്നോട്ടുവയ്ക്കുന്നത്. ആദിവാസി ജീവിതത്തിൻറെ പതിപ്പ് കൂടിയാണ് അദ്ദേഹം. മൺമറഞ്ഞു കൊണ്ടിരിക്കുന്ന വിത്തിനങ്ങളെ സംരക്ഷിക്കുന്ന അദ്ദേഹത്തിൻറെ വാക്കുകൾ എന്നും പ്രചോദനം തന്നെ. ശാസ്ത്രവും സംസ്കാരവും ഒന്നിക്കുന്നത് ഇവിടെ നമുക്ക് കാണാം.

    മധ്യവേനലവധി കഴിഞ്ഞ് സ്കൂളുകളും മറ്റ് വിദ്യാഭ്യാസ സ്ഥാപനങ്ങളും തുറന്നു പ്രവർത്തിക്കാൻ തുടങ്ങിയ ഈ ജൂൺ മാസം പരിസ്ഥിതിദിനവും വായനദിനവും പിതൃദിനവും ഒക്കെ കൊണ്ട് സമ്പുഷ്ടമാണ്.  ഇടവപ്പാതി തിമിർക്കുന്ന ഈ ജൂൺ.... കഴിഞ്ഞ വർഷം ചൂരൽമലയിലും മറ്റുമുണ്ടായ ഉരുൾപൊട്ടലിൽ നിന്നും ഉയിർത്തെഴുന്നേൽക്കുന്നേയുള്ളൂ നമ്മൾ. ആ ജൂൺ , കലണ്ടറിൽ നിന്നും കറുത്ത പക്ഷികൾ അടർന്നു വീഴുന്നതായി ചുള്ളിക്കാട് എഴുതിയ ജൂൺ... പുതിയ തുടക്കങ്ങളുടെ ,അക്ഷരങ്ങളുടെ ജൂൺ.. അഭിമാനത്തോടെ 2025 ജൂൺ ലക്കം വായനക്കാരുടെ മുന്നിലേക്ക് അവതരിപ്പിക്കുന്നു. സ്വീകരിക്കുമല്ലോ .....

സസ്നേഹം 

ഇഷ്യു എഡിറ്റർ
ജൂലി എ.

അസിസ്റ്റൻറ് പ്രൊഫസർ മലയാള വിഭാഗം

സർക്കാർ വനിതാ കോളേജ് തിരുവനന്തപുരം