വൈജ്ഞാനിക മലയാളം ഈ ലക്കം കേരളപ്പിറവി പതിപ്പാണ്. ഭാഷാടിസ്ഥാനത്തിൽ കേരളം രൂപം കൊണ്ടിട്ട് 69 വർഷങ്ങൾ തികയുന്നു. എഴുപതാം വർഷത്തിലേക്ക് കടക്കുന്ന നമ്മുടെ നാടിൻ്റെഭാവി സ്വപ്നങ്ങളോട് ചേർന്ന് നിൽക്കാനാണ് വൈജ്ഞാനിക മലയാളം ഈ ലക്കത്തിൽ ശ്രമിക്കുന്നത്. ദേശം എന്ന നിലയിൽ കേരളത്തിന്റെയും ഭാഷ എന്ന നിലയിൽ മലയാളത്തിന്റെയും ഭാവി സാദ്ധ്യതകളെ സസൂക്ഷ്മം വിലയിരുത്തുന്ന ഈടുറ്റ ലേഖനങ്ങൾ ഉൾപ്പെടുത്താൻ ശ്രമിച്ചിട്ടുണ്ട്. സാമൂഹ്യനീതിയും ജനാധിപത്യവും മതേതരത്വവും പോലുള്ള അടിസ്ഥാനമൂല്യങ്ങളെ സംരക്ഷിക്കുന്നതിന് കേരളം സൃഷ്ടിച്ചെടുത്ത സവിശേഷമായ മാതൃകയെന്തെന്ന്  തുടർന്നുള്ള താളുകൾ അന്വേഷിക്കുന്നുണ്ട്. സമകാലിക കേരളീയപരിസരത്തിൽ സംഭവിക്കുന്ന രാഷ്ട്രീയവും സാമൂഹികവും സാംസ്കാരികപരവുമായ പരിണാമമുദ്രണങ്ങളെ വേരുകളിലേക്ക് ഇറങ്ങിച്ചെന്ന് വിലയിരുത്തുന്നു. ഭാഷയുടെയും സംസ്കാരത്തിൻ്റെയും സ്വത്വം നിലനിർത്തിക്കൊണ്ട് സുസ്ഥിരവികസനത്തിലൂടെ  മുന്നോട്ടു കുതിക്കാൻ തയ്യാറെടുക്കുന്ന കേരളത്തിൻ്റെ ഭാവി സാധ്യതകളിലേയ്ക്കുള്ള ചൂണ്ടുപലക കൂടിയാകും ഈ ലക്കം എന്ന് പ്രതീക്ഷിക്കുന്നു. വൈജ്ഞാനിക മലയാളം കേരളപ്പിറവി പതിപ്പ് സന്തോഷത്തോടെ വായനക്കാർക്കായി സമർപ്പിക്കുന്നു.

 

​ഇഷ്യു എഡിറ്റർ

ഡോ. സംഗീത കെ.

ഇഷ്യു എഡിറ്റർ 

അസിസ്റ്റൻ്റ് പ്രൊഫസർ
മലയാളവിഭാഗം
സർക്കാർ വനിതാകോളേജ്
തിരുവനന്തപുരം