വൈജ്ഞാനികമലയാളം- പിയർ റിവ്യൂഡ് റിസർച്ച് ജേണൽ -2026 ഏപ്രിൽ -ജൂൺ ലക്കം പ്രകാശിതമാവുകയാണ്. 
ഭാഷ,സാഹിത്യം,സംസ്കാരം,ഭാഷാശാസ്ത്രം സിനിമ,ഫോക് ലോർ, നിർമ്മിത ബുദ്ധി എന്നിങ്ങനെ വൈവിധ്യമാർന്ന മേഖലകൾ ആഴത്തിൽ വിശകലനം ചെയ്യുന്ന പ്രബന്ധങ്ങളാണ് ഈ ലക്കത്തിൽ ഉൾപ്പെടുത്തിയിരിക്കുന്നത്. 
പ്രശസ്ത ചിന്തകനും വിമർശകനുമായ ഡോ. ടി. ടി. ശ്രീകുമാറുമായുള്ള അഭിമുഖം,അധ്യാപനവും ഗവേഷണവും പുതിയ കാലഘട്ടത്തിന്റെ പ്രശ്നങ്ങളെ നേരിടാൻ സമൂഹത്തെ എത്രമാത്രം പര്യാപ്തമാക്കുന്നു എന്ന് നമ്മെ ബോധ്യപ്പെടുത്തുന്നു. 
ലോകത്തിന്റെ ബൗദ്ധിക വീക്ഷണങ്ങൾ മലയാളിലോകത്തിന് മനസ്സിലാവുന്ന രീതിയിൽ അവതരിപ്പിക്കാനും അവ നമ്മുടെ ജീവിതസാഹചര്യങ്ങളിൽ എങ്ങനെ പ്രവർത്തിക്കുന്നു എന്ന് കണ്ടെത്താനും അദ്ദേഹത്തിന്റെ എഴുത്തിന് സാധിക്കുന്നുണ്ട്. കേരളീയ വികസന മാതൃക എന്ന ആശയത്തെക്കുറിച്ചുള്ള അദ്ദേഹത്തിന്റെ നിരീക്ഷണങ്ങളും ഏറെ ശ്രദ്ധേയമാണ്. മാറുന്ന ചുറ്റുപാടുകളിൽ സുസ്ഥിരവും സുരക്ഷിതവും എന്ന് തോന്നുന്ന പല മേഖലകളും പുനർനിർവചിക്കപ്പെടേണ്ടിവരുന്നു. പ്രാകൃതം എന്ന് പോലും തോന്നാവുന്ന ആചാരങ്ങളും അനുഷ്ഠാനങ്ങളും നിലനിൽക്കുന്ന നാടാണിത്. വിജ്ഞാനത്തിന്റെ ലളിതമായ ആവിഷ്കാരങ്ങൾ മാത്രമേ അവർക്കു ഉൾക്കൊള്ളാനാവൂ. അറിവിലൂടെ ലോകത്തെ ക്രമീകരിക്കുക എന്ന സംവിധാനം ഇന്നും പലപ്പോഴും നമുക്ക് അപരിചിതമാണ്.
ഈ ലക്കം മികച്ച രീതിയിൽ സംവിധാനം ചെയ്ത ഇഷ്യൂ എഡിറ്റർ ഡോ. ശ്രീലക്ഷ്മിയെ അഭിനന്ദിക്കുന്നു . ലക്കം രൂപകൽപ്പന ചെയ്ത രതീഷിന് നന്ദി. ഗൗരവതരമായ വായനയ്ക്കും ചർച്ചകൾക്കുമായി ലക്കം സമർപ്പിക്കുകയാണ്
 

ചീഫ് എഡിറ്റർ
പ്രൊഫ.(ഡോ.) ബി.ശ്രീകുമാർ സമ്പത്ത് 
വകുപ്പധ്യക്ഷൻ, മലയാളവിഭാഗം